Gibasura sa Sandiganbayan ang kasong graft and falsification batok kang kanhi Bise Presidente Jejomar Binay ug anak niini nga si kanhi Makati City Mayor Jejomar “Junjun” Binay Jr.
Kini may kalambigitan sa giingong iregularidad sa pagtukod sa Makati City Science High School building. Base sa 86 ka pahina nga resolusyon sa Special Fifth Division, gitugotan nila ang hangyo ni Binay ug sa iyang kaubang mga akusado nga ibasura ang kasong graft and falsification of a public document tungod sa kakuwang sa igong ebidensiya.
Giingong napakyas ang prosekusyon sa pagpresentar og igong ebidensiya sa kaso, mao nga nalapas ang batakang garantiya sa konstitusyon sa presumption of innocence.
Nagsugod ang kaso niadtong 2018 dihang gimando sa Office of the Ombudsman ang pagpasaka og kaso batok sa pamilyang Binay tungod sa panagkunsabo sa pagtukod sa Makati Science High School building nga nagkantidad og P1.3 bilyones.
Gisusi sa mga prosekusyon ang mga testimonya sa mga testigo nga engineer ug kanhi empleyado sa Makati City nga si Mario Hechanova, Atty. Renato Bondal, Senador Antonio Trillanes IV ug kanhi Makati City Vice Mayor Ernesto Mercado.
Nasuta sa Special Fifth Division nga walay direktang kahibalo ang mga saksi sa ilang gipasangil sa mga ginikanan ni Binay.
Tungod niini , ginkansela ug gibalik sa Special Fifth Division ang nabayaran nga piyansa sa mga akusado ug gikansela usab nila ang Hold Departure Order nga ilahang gi-issue
