Nilusad ang National Union of People’s Lawyers (NUPL) og signature campaign nga nagdasig kang President Ferdinand Marcos Jr. nga hatagan ug clemency ang Pinay nga naa sa death row sa Indonesia nga si Mary Jane Veloso.
Kini nga petisyon kabahin sa “Save Mary Jane Veloso Task Force” sa NUPL nga gitumong aron mahatagan ug katin-awan ang kahimtang ni Veloso ug i-promote ang luwas niyang pagbalik sa nasod human sa kapin 1 ka dekada nga pagkabilanggo sa Indonesia.
Ang kasinatian ni Veloso isip biktima sa human trafficking gipasiugda sa petisyon, diin giingon nga si Mary Jane dili angay isipon nga kriminal kondili usa ka biktima.
Ang petisyon nagtumong sa pagkuha sa kaylap nga suporta, susama sa usa ka signature campaign niadtong 2015 nga nakakolekta og dul-an sa tunga sa milyon nga pirma sulod sa pipila ka semana.
Niining bahina, giawhag sa NUPL ang mga indibidwal sa tibuok kalibutan nga mopirma sa petisyon.
Kahinumdoman nga sa miaging semana, si Presidente Ferdinand Marcos Jr. nipadayag sa pagkabukas sa paghatag og clemency kang Veloso.
