Posibleng mobalik na sa nasud si retired police colonel ug kanhi PCSO GM Royina Garma human gibabagan sa pag-abot sa Amerika sumala pa ni Philippine Ambassador to the United States Jose Manuel “Babe” Romualdez.
Gikompirma usab sa PH envoy nga gipahibalo sa mga awtoridad sa US ang Philippine Consulate sa pagkabilanggo ni Garma.
Kahinumdoman nga si Garma mibiya sa nasod uban sa iyang anak niadtong Nobiyembre 7 ug na-intercept ug natanggong sa US Immigration sa San Francisco tungod sa iyang nakanselar nga visa.
Gipasabot ni Ambassador Romualdez nga posibleng tungod sa Magnitsky Act ang pagkansela sa visa ni Garma.
Tungod ubos niini nga balaod, ang gobyerno sa US nagdili sa pagsulod, pag-freeze sa mga kabtangan ug pagpatuman sa uban pang mga silot batok sa langyaw nga mga opisyal sa gobyerno nga nalambigit sa mga paglapas sa tawhanong katungod.
Ang US Embassy sa Manila nagdumili sa pagkomento bahin sa pagkansela sa visa ni Garma tungod sa mga kabalaka sa pagkapribado.
Kahinumduman nga gipasanginlan ni Garma si kanhi Presidente Rodrigo Duterte nga nag-organisa og national task force base sa Davao model aron pondohan ang anti-illegal drugs operations diin giingong dunay cash reward system ang makapatay sa mga drug suspects..
