Mi-withdraw gikan sa partnership sa Commission on Elections (Comelec) ang St. Timothy Construction Corporation (STCC), ang usa sa tulo ka lokal nga kompanya sa South Korean Miru Systems-led joint venture (JV) alang sa automated election system (AES) sa 2025 election.
Gipahibalo kini sa comelec. Sumala ni Comelec chairperson George Erwin Garcia resulta kini human nagpahibawo ang poll body sa impormasyon nga pipila sa mga gikaingong tag-iya sa STCC nagpadayag og tinguha nga modagan sa lokal ug nasudnong mga posisyon sa sunod tuig nga eleksyon. Mahitabo dinhi ang posibleng conflict of interest.
Ang STCC naghatag sa Net Financial Contracting Capacity (NFCC) alang sa P17.99 bilyon nga kontrata alang sa bag-ong automated election system ug automated counting machines (ACM) alang sa 2025 nga botohan.
Ang laing duha ka lokal nga kompanya mao ang Integrated Computer Systems ug Centerpoint Solutions Technologies, Inc. Sa pagkakaron, wala pa makadesisyon ang Comelec kon dawaton ba ang withdrawal.
Matud sa poll body i-refer ang insidente ngadto sa ilang Law Department nga magrekomenda sa tukmang aksyon ug maglatid sa nahibiling obligasyon sa nahibiling partners.
