Gipaklaro sa Presidential Communications Office (PCO) ang mikatag nga video kung asa makita ang usa ka indibidwal nga may gitunol nga butang kang Pangulong Ferdinand Marcos Jr. samtang naa sa panagtigom.
Sa video nga gipost, nanawagan ang PCO sa publiko nga masusihon, gipaklaro nga ang gitunol ang usa ka lapel pin nga may simbolo sa ilang politikal nga partido, ug ang mitunol ang usa ka sibilyan nga nagpaabot nga maka-selfie sa pangulo.
Gikadugang sa PCO nga gigamit sa pipila ka indibidwal ang mga susama nga matang sa content aron magpakatag ug sayop nga impormasyon.
Gumikan matud pa sa pagputol ug pag-blur sa video ug paghatag ug sayop nga konteksto, nanggawas ang nagkalain laing pagduda gikan sa netizens, lakip na ang nagbutyag nga ang gitunol nga butang ang usa ka sachet nga may unod nga “white substance”.
Gumikan niini, giawhag sa PCO ang publiko nga maghuna huna, magsusi, sayron ang tibuok estorya , obserbahan ang mga detalye, ug dili magpa-ilad sa fake news.
