Miarangkada na ang una sa tulo ka adlaw nga 2024 online Bar examinations. Sumala sa Korte Suprema magsugod ning adlawa, Domingo, Septiyembre 8 ang bar exam sa 13 ka local testing centers (LTCs) sa tibuok nasod. Mikabat sa 12,246 ka mga law graduates ang nagparehistro alang sa eksaminasyon. Matigayon ang ulahing duha ka adlaw sa eksaminasyon sa Septiyembre 11 ug 15. Gilauman nga ipahibalo ang mga resulta sa mga eksaminasyon sa dili pa matapos ang tuig, ug ang signing sa roll of attoneys ipahigayon dayon pagkahuman sa oath taking.
Una nang gipahibalo sa SC nga ang mga LTC sa National Capital Region anaa sa Uniersity of the Philippines Diliman, Quezon City; University of Santo Tomas sa Sampaloc, Manila; San Beda University sa San Miguel, Manila; Manila Adventist College sa Pasay City; UP sa Bonifacio Global City; ug San Beda College sa Alabang, Muntinlupa City. Ang mga LTC sa Luzon anaa sa Saint Louis University sa Baguio City ug sa University of Nueva Caceres sa Naga City.
Sa Visayas, ang LCTs naa sa University of San Jose-Recoletos, Basak Campus sa Cebu City; Central Philippine University sa Jaro, Iloilo City; ug Dr. V. Orestes Romualdez Educational Foundation sa Tacloban City. Samtang ang LCTs sa Mindanao anaa sa Xavier University sa Cagayan de Oro City ug Ateneo de Davao University, Senior High School Campus sa Bangkal, Davao City. Sama sa 2023 BAR EXAM, adunay unom ka core subjects sa 2024 Bar exams. Kini gilangkuban sa Political and Public International Law, Commercial and Taxation Laws, Civil Law, Labor Law and Social Legislation, Criminal Law, Remedial Law, and Legal and Judicial Ethics with Practical Exercises.
