Gihinganlan ni kanhi PDEA intelligence agent Jonathan Morales ang iyang giingong confidential informant kalabot sa kontrobersyal nga mga leak sa PDEA sa organisadong rally sa mga sakop sa Kingdom of Jesus Christ sa Liwasang Bonifacio sa dakbayan sa Manila.
Kahinumduman nga nagdumili ang kanhi opisyal sa PDEA sa pagbutyag sa pagkatawo sa iyang confidential informant dihang gipangutana kini ni Senador Ronald Dela Rosa atol sa hearing sa Senate Committee on Public Order and Dangerous Drugs kaniadtong Mayo niing tuiga tungod kay nabalaka alang sa iyang kaluwasan.
Nahimong kontrobersyal ang nanggawas nga mga dokumento sa PDEA human malambigit ang pangalan ni President Ferdinand Marcos Jr. ug aktres nga si Maricel Soriano tungod sa paggamit sa ilegal nga drugas.
Gibutyag ni Morales nga ang suod nga higala ni President Marcos nga si Bong Daza nga giingong usa sa mga confidential informant sa mga leak sa PDEA maoy nipaubos sa presidente.
Sa laing bahin, kahinumdoman nga ang San Fernando Municipal Trial Court nihukom nga sad-an si Morales sa kasong perjury tungod sa pagpamakak sa iyang testimonya sa kaso sa drugas niadtong 2011.
Gisentensiyahan siya og 4 ka buwan nga pagkabilanggo ug gipamulta og P1,000.
