GENERAL SANTOS CITY-Nagmando si General Santos City Mayor Lorelie Pacquiao og imbestigasyon sa giingong mga iregularidad sa pagsingil og bayad sa mga stallholders sa flea market sa dakbayan, alayun sa umaabot nga selebrasyon sa Tuna Festival 2024.
Kagahapon, gibutyag ni City Administrator Franklin Gacal nga nakadawat og mga reklamo si Mayor Pacquiao og isyu bahin sa mga stall rentals ug uban pang bayronon.
Giistorya sa Mayor ang mga nagreklamo nga stall holders sa flea market nga nitaho sa anomaliya nga nahitabo sa bayronon.
Sa pamahayag ni Atty. Gacal nga ipatawag sa mayor ang mga nalambigit sa maong reklamo.
Sa nakalap nga impormasyon sa Bombo Radyo, bahin sa maong isyu, adunay pipila ka negosyante nga mokuha og 5 hangtud sa 10 ka pwesto ngadto sa Flea Market Organizer sa barato ra nga presyo ug pa-arkilahan nila kini ngadto sa laing mga negosyante sa tag-P5,000 pataas matag-pwesto.
