Ablihan na sa mga pambato sa boxing nga sila si Nesthy Petecio ug Eumir Marcial ang ilang tagsa-tagsa nga tinguha alang sa bulawang medalya pinaagi sa pagsugod sa ilang dula sa 2024 Paris Olympics.
Si Petecio, kinsa nakadaog og silver medal sa miaging edisyon sa olympics, paningkamutan nga mauli na ang bulawang medalya karong higayona.
Una niyang makaatbang mao ang 22-anyos nga si Jaismine Lamboria sa India alang sa ilang Round of 32 nga sangka sa women’s 57kg class sa North Paris Arena sa alas-11:54 sa gabii oras sa Pilipinas.
Sa laing bahin, laing Olympic medalist nga si Marcial ang sugdan na usab ang aksyon human makaangkon og Round of 32 bye.
Ang 28-anyos kinsa midala og bronze medal sa Tokyo, makigsangka kang Turabek Khabibullaev sa Uzbekistan sa Round of 16 aron sugdan ang iyang kaugalingong kampanya alas 3:04 sa buntag sayo sa Miyerkules oras sa Pilipinas.
