Nakigkita si Bise Presidente Sara Duterte sa iyang mga supporters alang sa ilang mainitong pag-abiabi ug suporta kaniya ug sa iyang pamilya sa dihang miadto siya sa Munich, Germany.
Mokabat sa 22 ka mga Filipino ang mitambong sa tigom gikan sa Switzerland, Austria ug ubang bahin sa Germany isip kabahin sa Hakpan group sa Maisug International Germany.
Nagpasalamat si VP Sara sa ilang oras nga gihatag kaniya ug sa iyang pamilya.
Sa nasangpit nga tigom, gipasabot ni VP Sara ngadto sa nanambong nga mga Pinoy nga dako ang ilang utang kanila tungod sa suporta nga ilang gihatag gikan ni kanhi Presidente Rodrigo Duterte ug kaniya karon.
Ang Bise Presidente ug ang iyang pamilya naa sa Munich alang sa usa ka personal nga bakasyon.
Nasayod usab si VP Sara nga daghan sa iyang mga dumadapig ang naggasto sa ilang kaugalingong kuwarta aron pagtabang sa mga kabus.
Misaad si Duterte nga padayon silang magmatinud-anon sa pagserbisyo sa katawhan sa nasud ug bisan asa.
Dunay misaway kang Duterte sa tayming sa iyang pagbakasyon tungod sa lapad nga pagbaha sa Metro Manila ug silingang mga dapit.
Gipasabot sa Office of the Vice President nga ang bakasyon dugay na nga giplano ug girespeto ang iyang privacy.
