Gipahibalo sa Department of Finance (DOF) nga dul-an sa P100 billion ang mawala sa ekonomiya sa Pilipinas matag tuig tungod sa padayong operasyon sa Philippine Offshore Gaming Operators (POGO).
Sa hearing sa Senate Committee on Ways and Means, gipaambit ni Finance Undersecretary Karlo Adriano nga bisan og moabot og P166.59 billion ang ekonomikanhong benepisyo o kuwarta nga dad-on sa mga POGO sa nasod, apan ang gasto sa ekonomiya moabot sa P265.74 billion o nalugi ang ekonomiya sa Pilipinas gikan sa ilang padayon nga operasyon.
Mao nga kung atong hisgotan, mawad-an kita og P99.52 billion sa ekonomiya sa nasud.
Matod niya nga wala pay labot niini ang gitawag nga ‘social cost’ gikan sa mga POGO o ang mga krimen ug uban pang natala nga ilegal nga kalihokan nga may kalambigitan sa POGO ug ang epekto sa maong mga ilegal nga kalihokan sa komunidad.
Tungod niini, girekomenda sa DOF ang pagbawal sa operasyon sa POGO sa Pilipinas.
