Mismo ang boxing legend ug Filipino pride nga si Manny Pacquiao ang nagkumpirma nga may mga negosasyon alang sa iyang comeback ug potensyal nga world title fight.
Gibutyag kini sa 45-anyos nga Pinoy boxer human ang pag-anunsyo nga nagpirma kini alang sa three-round 68kg boxing match batok sa Japanese mixed martial artist nga si Chihiro Suzuki sa Saitama, Japan sa Hulyo 28.
Sumala kang Pacquiao, ginahay-ay pa ang away niini batok sa American fighter nga si Mario Barrios alang sa WBC welterweight world title apan wala pay klaro sa diskusyon.
Posible nga Nobyembre ukon Disyembre sumala pa sa kanhi senador.
Pebrero dihang gianunsyo nga napakyas si Pacquiao sa iyang tuyo nga marepresentar ang Pilipinas sa Paris Olympics tungod gibasura sa International Olympic Committee ang special request tungod lampas na ang iyang edad sa 40-anyos nga limit.
Kahinumduman nga nag-retiro si Pacquiao kaniadtong 2021 human gipildi sa Cuban boxer nga si Yordenis Ugas sa Las Vegas nga mao na ang nagmarka sa iyang pinal nga professional fight.
Nagdagan kini sa pagka-presidente kaniadtong Mayo 2022 elections apan napildi.
Kaniadtong Disyembre 2022, nagbalik kini sa ring sa Seoul, South Korea alang sa usa ka exhibition fight.
