GENERAL SANTOS CITY – Ugma na ipasaka ang kaso batuk sa pick-up truck driver nga nakabangga patay.
kini ang nahimong pahayag ni Police Sgt. Jonel Bituonan case investigator sa Maasim Municipal Police Station.
Gani natapos na ang paghimo ug affidavit complaint batuk sa driver nga si Jaylan Inantay, 36 anyos nga residente sa Sitio Asnalang, Tinoto, Maasim Sarangani.
Matud ni Bituonan nga mga kaso nga reckless Imprudence Resulting to multiple Homicide, Reckless Imprudence resulting to multiple injuries ug damage to properties ang ilang iduso sa Provincial Prosecutors Office.
Kini human nabanggaan sa pick-up ang pedikab nga maneho ni Gregorio Pilon Jr. nga residente sa Maasim Sarangani samtang sakay ang mga biktima nga silang Loreto Zamora, Jomar Pilon, Erwin Pilon ug Froilan Akbat pulos residente sa Asnalang, Tinoto, Maasim.
Sa pagresponde sa kapulisan sa lugar pasado alas dos sa kaadlawon Marso 1, 2024 nadala na sa tambalanan ang mga biktima apan gideklara nga dead on arrival sa Maasim Municipal Hospital silang Loreto Zamora, Jomar Pilon ug Erwin Pilon.
Miaging adlaw nahunusan usab sa kinabuhi ang driver sa pedikab nga si Gregorio Pilon hinungdan nga upat na ang namatay samtang usa pa ka biktima ang naa sa tambalanan.
Nasuta usab sa kapulisan nga expire ang lisensya sa driver samtang apil nga mupasaka ug reklamo ang tagbalay nga nahugno dihang madasmagan sa pick-up truck.
