GENERAL SANTOS CITY – Gireklamo sa mga myembro sa Sarangani Vegetables Seed Growers Multi-Purpose Cooperative ang dili dayag nga pagpadagan karon sa ilang Coop Manager.
Kini human nagpatawag ug tigum ang East West Seed company Incorporated sa mga myembro sa nahisgutang kooperatiba miaging adlaw.
Buot sa mga myembro nga diretso nga makigsabot sa kompanya sa semelya ug ila nang talikdan ang ilang membership sa kooperatiba.
Mismong ang General Manager sa East West seed company nga si Jay Lopez ang mibiyahe gikan sa Batangas paingon sa Malungon Sarangani aron pagtubag sa mga reklamo.
Diretsahan usab giangkon sa opisyal nga diretso na kini nga makig transact sa mga seed grower aron diretso na ang bayad ug dili na muhapit sa laing mga kamot.
Nahibaw-an usab sa mga myembro nga ang ilang kooperatiba nga SAVESEGROW ang may dakong utang sa seed company.
Nasuta nga daghan sa mga seed grower ang nagreklamo nga dugay muabot ang bayad sa gibaligya nila nga semelya tungod giutang matud pa sa kompanya.
Ang SAVESEGROW ang nagatanum ug mga gulay sama sa patola, pipino ug daghan pa.
