GENERAL SANTOS CITY – Dismayado ang pipila ka mga Overseas Filipino Workers (OFW) sa Sudan tungod kay hangtod karon wala pa sila mapabakwit.
Sa exclusive interview sa Bombo Radyo Gensan kay Mario Lumigpit, Bombo International Correspondent sa Sudan ug uban pa nga OFWs, mga Filipino na lang ang nabilin sa maong lugar tungod ang ubang nasyonalidad ang gipabakwit na sa ilang gobyerno.
Nasayran nga kagahapon laing batch sa mga Pinoy ang misakay sa bus nga gi-commission sa usa ka kompanya nga mohatod kanila sa Port of Sudan paingon sa Saudi Arabia.
Matod ni Lumigpit, nagbuhat na lamang sila ug kaugalingong paningkamot nga makabiya sa Sudan tungod kay makapila na sila nga nanawag sa gobyerno apan wala gihapon niabot nga tabang.
Matod niya, kadaghanan kanila walay pasaporte ug ubang mga dokumento kay gikuha na kini sa ilang mga amo.
Si Lumigpit usa lang sa na-rescue sa ubang mga Pinoy nga adunay mga amo nga kasamtangan pa nga nagpaabot nga mabakwit.
Kahinumdoman nga naguba ang tugpahanan sa Sudan ug kinahanglan pa silang mobiyahe og napulo ka oras paingon sa Egypt o kaha mobiyahe sila pinaagi sa pagsakay sa military vessel sa pantalan sa Sudan paingon sa Jeddah.
