GENERAL SANTOS CITY – Daw wala mituhop sa hunahuna ni ex-Pinoy WBC featherweight champion Mark ‘Magnifico’ Magsayo ang mga tambag kaniya ni Nonito Dodong Sr. usa ka boxing analyst alang sa engkwentro kang Mexican boxer Rey Vargas.
Sa pakighinabi sa Bombo Radyo GenSan kang Dodong Sr. direkta sa California USA, gibutyag niini nga sa wala pa ang away, personal niining gisultihan si Magsayo nga kinahanglang bag-uhon ang istratehiya sa pagsumbag tungod nakita niini nga gawas nga ga-rely lang sa iyang kusog, dili usab accurate ang mga gibuhiang kinumo mao nga dili makaigo sa kontra.
Matud ni Nonito Sr. gi-swerte lang gani si Magsayo sa pagdaug sa duha ka unang away batok kang Mexican boxer Julio Ceja human nga iyang na-knockout sa last round samtang na-injured si American boxer Gary Russell Jr. atol sa ilang away.
Gibutyag sa amahan sa ‘The Filipino Flash”, nga sa iyang pangagpas nangita lang og tyansa si Magsayo nga ma-knockout si Vargas kung diin dili kini magsilbi gawas kon makahimo og ‘lucky punch”.
Dugang pa niini nga mas maayo unta nga daghang punching combinations ang gibuhian ni Magsayo.
Sa iyang pamahayag nga bentaha unta ang taas nga height ni Magsayo nga 5’10 tungod makapabor sa pagsumbag .
Samtang galaum si Donaire Sr. nga mangayo og rematch ang kampo ni Magsayo ngadto kang Vargas.
