GENERAL SANTOS CITY – Posibleng bangi sa yuta ang anggulo sa motibo sa pagpusil patay sa usa ka retired member sa Armed Forces of the Philippines apan padayon pa kining giimbestigahan sa kapulisan.
Gipusil patay ang real estate owner nga si Elicardo Cabangal, 70 anyos, atbang sa Barangay Hall sa City Heights ning syudad.
Matud kang P/Lt. Miguel Quidilla, ang deputy chief sa San Isidro Police Station walay nagpamatuod nga adunay sakyanan nga nagpaabut sa biktima gawas sa iyang gipuy-an.
Apan sa usa ka kuha sa CCTV camera nga ilang nahipos, usa ka 4-wheeled vehicle nga Avanza kulay silver ang kalit mihunong og gipusil sa suspek ang biktima nga nag-inusarang naglakaw gawas sa real estate office sa Purok Paradise sa Barangay City Heights.
Nahimo pang 50-50 ang biktima sa ospital nga may tulo ka samad sa pinusilan sa likod apan wala madugay nakabsan gihapon kini sa kinabuhi.
Narekober sa crime ang duha ka empty shell sa caliber M16.
