GENERAL SANTOS CITY – Ipadayon gihapon ang gihimong imbestigasyon sa kapulisan sa pagpamusil sa usa ka Indian National bisan nga nagpadayag nga dili mupasang-at ug kaso batok sa kinsa man nga suspek.
Kahinumduman nga ang biktima ang nailhan nga si Ramandep Sign Varn, hamtong ang pangidaron nga taga Purok, Malakas, Brgy. San Isidro ning dakbayan.
Matud ni Police Capt. Rissa Hernaez, Chief Of Police sa Fatima Police Station nga sa karon blangko pa sila sa posibleng motibo sa maong pagpamusil gumikan subay sa pamahayag sa biktima, wala kini nasayran nga naka-away.
Kon kahinumduman gipusil ang biktima atol sa pagpaningil sa gipautang matud pa niini sa usa ka bakery sa may Barangay Fatima ning syudad.
Ang maong Indian national swerteng wala mapuruhan tungod sa iyahang tuhod lamang kini nakaangkon og samad pinusilan.
Apan dako matud pa ang posibilidad nga gikan sa Brgy. San isidro, gisundan na sa suspek ang biktima.
