GENERAL SANTOS CITY – Nagpabilin sa selda sa Alabel PNP ang unom ka mga dinakpan nga nalambigit sa investment scam.
Matud pa kang P/Capt. Wesley Matillano, hepe sa Alabel Municipal Police Station nga ang mga dinakpan mao silang Onofre Labrador, Claire Labrador, Honesto Labrador, Yolanda Ugdar , Fred Labrador og Beverly Labrador mga residente sa Barangay Tocawal, og Baluntay, Alabel, Sarangani Province.
Gibutyag nga mga retired teacher ang mga nasampit nga may kalambigitan sa operasyon sa Munificence Ministry usa ka investment scam nga gatanyag og 45% nga interest kada bulan.
Sa pamahayag ni Capt. Matillano nga walay pyansa nga girekomenda ang korte alang sa temporaryong kagawasan sa mga nasampit gumikan kasong syndicated estafa ang ilang giatubang.
Ang main office sa Munificence Ministry ang makit-an sa Bula ning syudad kung asa kalit nga na-missing ang mga opisyal sa maong grupo human nga sunod-sunod nga gi-raid ang mga opisina sa mga investment scam.
