GENERAL SANTOS CITY – Nagpabiling nagtingkagol sa prisohan ang duha ka indibidwal nga nagpakaron-ingnon nga pulis sa gipahigayong entrapment operation sa NLSA Road, San Isidro ning syudad.
Ang mga dinakpan nailhan nga silang Wiilie Limao Jr nga taga Blaan Community Village labangal ning syudad og si Queenie Faciol nga Upper London, Barangay Bawing ning dakbayan.
Ang operasyon ang gihimo sa City Investigation and Detective Management Bureau sa General Santos City Police Office (GSCPO) kauban ang mga personahe sa San Isidro Police Station human nangayo og tabang ang biktima nga si Ian Yap, usa ka negosyante.
Matud pa nga nagpaila ang mga suspek nga silang Police Master Sergeant Limao og Police Corporal Faciol.
Misaad nga proteksyonan ang negosyo sa biktima nga Butane canister bugti sa P2,000 nga ihatag kanila kada bulan.
Nagsugod ang pagpangilkil kaniadtong September 2020 kung asa gihadlok ang biktima nga angayang maghatag ug P2,000 isip protection money tungod kung dili mutuman aduna matud pay mahitabo kaniya.
Tungod niini gipahigayon ang operasyon batok sa mga suspek og malampusong nasikop .
Narekober sa posisyon sa mga suspek ang usa ka Colt .45 caliber pistol og usa ka .38 caliber revolver apil na ang mga buhi nga bala niini og P2,000 marked money.
Nadiskubrehan sa mga pulis nga walay mga igong papeles ang nakumpiskang armas .
Patong-patong nga kaso ang giatubangon sa mga suspek nga nakasupak sa Article 177 o Usurpation of Authority sa Revised Penal Code, kasong robbery-extortion lakip ang Republic Act 10591 o Unlawful Possession of Firearms and Ammunition.
