GENERAL SANTOS CITY – Usa ka level 1 high value individual sa listahan sa kapulisan ang napatay sa gipahigayong buybust operation sa Regional Police Drug Enforcement Unit (RPDEU) kagahapong adlawa.
Patay ang target nga si Irish Lee Palabrica 36 anyos empleyado sa Department of Health (DOH) Sarangani nga residente sa Doña Soledad, Barangay Labangal ning syudad human nga misukol sa mga operatiba.
Ang buybust operation ang gipahigayon sa kakahuyan nga bahin sa daplin sa dalan paingon sa Doña Soledad.
Gibutyag nga nakamatikod si Palabrica nga mga pulis ang iyang ka-transakyon hinungdan nga mibunot sa dala nga armas apan naunhan kini pagpusil sa kapulisan.
Base sa imbestigasyon sa Scene of Crime Operatives (SOCO) usa ka pouch nga may 21 ka gituhu-ang sachet sa shabu nga nagkantidad og P35,000, usa ka unit sa caliber .45 pistol ug usa ka 150 cc nga motorsiklo.
Samtang wala gatuo ang pamilya nga ang .45 nga pistola nga nakuha sa mga pulis ang gipanag-iyahan sa biktima.
Hinoon giangkon sa iyang pamilya nga gipailawom sa drug rehabilitation ang nahisgutan gumikan sa ilegal nga droga apan nagbag-o na hinungdan nga nakatrabaho sa DOH.
