GENERAL SANTOS CITY – Kapin na sa 34,000 ka mga migratory birds ang namonitor sa Environmental Conservation and Protection Center raptor watch team nga miagi sa Raptor Hill sa barangay Rio del Pilar, Glan, Sarangani Province.
Kini base sa labing ulahing tala sa miaging Oktobre 4, 2020.
Ang mga namatikdan nga mga migratory birds ang gikalangkuban sa Chinese Sparrowhawk, Crested Honey Buzzar og Grey-faced Buzzard.
Ang maong mga lannggam ang gikan sa Japan, Taiwan, China og bisag sa Russia nga magpahulay sa Mt. Gulo og Mt. Taltak una magpadulong sa Indonesia.
Sa tuig 2019 nga 2nd Raptor Watch Festival anaa sa 161,719 ka mga migratory birds ang ilang namonitor sa nasampit nga area.
Sa tuig 2018 anaa sa 92,000 ka mga langgam ang miagi sa maong dapit samtang 135,000 sa tuig 2017.
Kaniadtong 2014 labing unang nadokomento sa ECPC ang presensya sa mga migratory raptors sa Rio del Pilar og kasikbit nga mga lugar susama sa Laguimit, Cross, og Batulaki.
Apan ning tuiga gikansela ang Raptor Watch Festival gumikan sa isyu sa pandemnya.
