GENERAL SANTOS CITY – Napasaka na ang kasong estafa batuk sa usa ka magtutudlo sa Polomolok South Cotabato human sa pagpangilad sa usa ka obispo gamit ang social media.
Kini human nga nadakpan ang nagpangalan og Dorris Dee Pamplona, aktibong teacher sa Elementaryang tulunghaan sa Polomolok human ang pagpangayo og tabang sa kapulisan sa nagpangalan og Lalaine Villaruel Suhanda, tag-iya sa inilang hotel sa GenSan og uban pang negosyo.
Nakig-alayon kini kang City PNP Director Col. Aden Lagradante dihang nabisto ang modus operandi sa suspek.
Nasayran nga gamit ang FB account sa usa ka Sister Dorris Dee Pamplona, nagpadala og private message ang suspek sa negosyante nga gidala ang pangalan ni Bishop Jose Bagaforo sa Diocese of Kidapawan alang sa pagpangayo og donasyon para sa tabernaculo.
Gibutyag sa biktima nga human siya makumbinsi, samtang anaa siya sa Phuket Thailand nagpadala siya og P218,000 sa bangko.
Nagpadala siya og mensahe kay Bishop Bagaforo nga Ok na ang pagpadala niya og dakong salapi apan gipadalhan siya og mensahe nga na-hack ang FB account niini.
Hinungdan nga paspas nga ipaklansela sa bangko ang napadala niining kuwarta apan na-withdraw na sa magtutudlo og wala na marekober pa.
Gilayong gipahigayon sa kapulisan sa dakbayan ang operasyon kung asa kuyog sa Polomolok Municipal Police Station, giadtuan ang suspek sa mismong gitudloan nga tulunghaan.
Aron dili mapaulawamn, gipatawag ang suspek sa opisina og didto na kini gidakop sa otoridad human nga napahibalo sa iyang gihimong salaud. Gidala sa GenSan si Teacher Pamplona og pormal nga napasakaan og kasong estafa.
Giangkon niini nga Sister kakunsabo niini ang pag-umangkon nga miagamit og FB account nga Father Albert Laden Lagora.
