GENERAL SANTOS CITY – Pormal nang nakasuhan ug syndicated estafa sa mga sakop sa Lagao Police Station ang tulo nga nasikop sa gipahigayon nga entrapment operation.
Kini human mapresenta nilang Police Lt. Felix Minion sa prosecutors Office silang Felipe Jayme Jr., 37-anyos, coordinator sa Core of Dreams Corporation, Leonilyn Jayme, 36-anyos, distributor ug Rey Jayme, 39-anyos, driver nga pulos taga Zamboanga del Sur.
Ang tulo ang nasikop sulod sa usa ka Inn sa Lagao kaniadtong miaging adlaw.
Matud ni Minion nga gireklamo ang tulo sa ilang mga biktima human matud pa gisaaran nga hatagan sa ilang interest paglabay sa trenta ka adlaw apan wala mahinayon hinungdan nga gireklamo.
Narekober ang budol money nga 23,000 , napulo ka botelya sa perfume, notebook ug 38,000 nga cash.
Lakip sa pasalig matud pa sa tulo ang tubo nga 100 percent sa gibutang nga puhunan.
Ang tulo ang gipasusi na sa Medico Legal aron sa pagsiguro nga naa sila sa maayong panglawas samtang gapaabut sa resolosyon sa piskalya.
