GENERAL SANTOS CITY – Patay ang usa ka Chief intel officer sa dakbayan sa Heneral Santos human nga gipusil sa mga suspek nga nakasakay sa motorsiklo .
Sa impormasyong nakuha sa Bombo Radyo GenSan , alas 9:30 sa gabie dihang gipusil sa wala mailhi nga mga suspek si Police Master Sergeant Emmanuel Coronado nga nakadestino sa San Isidro Police Station.
Samtang gimaneho sa biktima ang iyang kotse pagawas sa Maria Theresa Subdivision Barangay San Isidro ning dakbayan kauban ang tulo ka anak aron sunduon ang iyang asawa.
Wala makabantay ang biktima nga giatangan kini sa mga suspek og dayon gipusil.
Gihapa-an ni Coronado ang mga anak hinungdan nga siya ang napuruhan sa pagpamusil samtang ang usa niini ka anak ang nakadagan pagawas sa sakyanan.
Gisulayan pa og dala sa ospital ang biktima apan gideklara nga dead on arrival sa mga attending physician samtang samdan ang duha niini ka anak.
Dili limod nga daghang impormasyon ang gihuptan ang biktima may kalabutan sa iligal nga droga.
Kahinumduman nga kaniadtong Enero ning tuiga dihang gipusil-patay ang intel operative sa City Mobile Force Company nga si PO3 Jospeh Piquerda.
Padayon nga giimbestigahan sa San Isidro Police Station ang ilhanan sa mga suspek og motibo pagpamusil patay kang Coronado.
