GENERAL SANTOS CITY – Gipasalamatan ni Kagawad Jeng Gacal ang Bombo Radyo GenSan gumikan walay puas ang panawagan ngadto sa katawhan nga dili mag-invest sa nagkadaiyang mga investment company.
Gibutyag ni Kagawad Gacal nga ning higayona napamatud-an na nga pulos binuang ang gihimo sa mga investment company nga gidagan na ang kwarta sa mga investors.
Gikadugang pa niini nga mismo ang atong kaugalingon ang makatabang aron dili magtuo gilayon sa haylo sa mga investment company.
Samtang iyang gihingusgan nga ning higayona nga angayang maghuna-huna og 1,000 ka higayon una mag pay-in sa mga investment companies.
Kahibaluan nga ang Sangguniang Panlungsod ang nagpahigyon og investigation in aid of legislation kalabutan sa mga investment scam sa dakbayan nga ipadayon karong adlawa.
Nasayran nga ang Bombo Radyo GenSan ang kapin na sa usa ka tuig nga adlaw nga gahisgot batok sa mga investment scams nga usa ka ponzi scheme nga gapaklaro sa katawhan nga kini ilegal.
Sa pagkakaron adunay mga kaso na nga gipasaka ang NBI sa ubang mga opisyal sa mga investment scams ilabi sa mga gadumala sa KAPA.
