GENERAL SANTOS CITY – Kustodiya na sa Traffic Management Unit ang usa ka driver sa dump truck human gibanggaan niini ang motorsiklo sa National Highway Brgy. Magsaysay Polomolok South Cotabato.
Wasak ang nawong ug nabuak matud pa ang bungo sa biktimang si Marlon B. Bagcatin, hamtong ang pangidaron human nga gibanggaan ang motorsiklo niini sa dump truck nga maneho usab sa usa ka Franklin Cabangbang nga residente sa Purok Maunlad Silway 8.
Pulos trabahante sa LGU-Polomolok South Cotabato kung asa ang biktima na-assign isip mason sa Municipal Engineering samtang driver usab sa dump truck ang suspek.
Sa pakighinabi sa Bombo Radyo GenSan, gihingusgan sa driver nga dili tinuyo ang panghitabo sukwahi sa pahayag sa mga residente nga paspas ang padagan niini.
Apan andam ang suspek nga atubangon ang kasong ipasala kaniya sa pamilya sa biktima.
Una niini, giangkon ni Cabangbang nga wala niya mamatikdan nga nakabangga og motorsiklo dihang maglabay lang unta og mga basura sa Brgy Matin-ao.
Kasong reckless imprudence resulting to homicide and damage to property ang atubangon sa nasampit.
