GENERAL SANTOS CITY- Usa ka intel officer sa Lagao Police Station ang person of interest sa pagpamusil sa Explore Bar miaging gabii.
Kini ang migawas sa gihimong imbestigasyon sa kapulisan kon diin nagpahigayon usab ug pressconference may kalabutan niini.
Nasayran nga ipailawom gilayon sa parrafinm test, ballistic ug cross matching ang pulis nga si P/ Staff Sgt Clifford Randel Bayandan human nga naimbestigahan ug nakakuha ang mga otoridad ug basiyo sa 9mm nga maoy ginaisyu nga armas sa kapulisan.
Hinuon, sa dihang nasayran ni Bayandan nga siya ang gitudlong person of interest dayon kining misurender lakip na ang iyang armas.
Nasayran nga namatay sa pagpamusil si Jay Napalit, 22 anyos, tricycle driver ug residente sa Purok 4B Rajah Muda, Bula.
Samtang nasikop na usab si John Patrick Polo nga taga Bula ning syudad nga maoy suspek sa pagpanunggab ngadto kang John Vincent Lopez, 21 anyos nga taga Purok Guadalupe Barangay Conel.
Nasayran nga gisirado na kagahapong adlawa ang Explore Bar nga giingong sinugdanan sa krimen sa lugar.
