GENERAL SANTOS CITY – Personal grudge ang gilantaw nga motibo sa kapulisan sa pagpamusil-patay sa usa usab ka habal habal driver sa Prk. San Miguel Brgy. Calumpang ning syudad, Dominggo sa gabii.
Base sa impormasyon nga nahipos nilang Police Major Baser Alindo sa Tambler Police Station, gawas nga usa ka kristo matud pa sa sabungan, ilang nasayran nga walay rekord sa mga presinto ang biktima nga si Arman Ponteras, 44-anyo, residente sa nahisgutang lugar.
Hinungdan nga dako ang pagtuo sa imbestigador sa kaso nga may nasuko o nakaaway ang biktima.
Apan sukwahi kini sa pahayag sa pamilya nga walay nasulti sa ilaha ang nasampit nga may nakaaway.
Kahinumduman, sunod-sunod nga buto ang nadunggan sa may Prk San Miguel Calumpang niadtong Dominggo pasado alas-sais sa gabie.
Dihang gisusi sa mga kaubanang habal habal drivers nakaplagan na lang nila ang biktima tapad sa iyang motorsiklo nga nagkadugo na ang ulo og wala na maglihok.
Sa pagsusi sa ginsakpan sa SOCO, nakahiagom ug duha ka igo sa bala sa pusil ang biktima.
Samtang hangtod karon blangko gihapon ang kapulisan sa ilhanan sa gun man.
