GENERAL SANTOS CITY – Gidayeg sa netizens ang pagbuhi sa 528 ka gagmay nga pawikan sa ilang habitat sa tumong nga makonserba ug maprotektahan ang nagkahurot na nga pawikan ngadto sa Sarangani Bay.
Matud ni Nilo Tamoria, executive director sa Department of Environment and Natural Resources (DENR) 12 may kalabutan kini sa pagbuhi sa Olive Ridley hatchlings sa Barangay Lumasal, Maasim Sarangani.
Sumala pa nga gipalumluman ang mga itlog sa pawikan sa hatchery nga iya sa LGU Maasim.
Ang pagbuhi sa semelya sa mga pawikan ang gipangunahan sa DENR – Community Environment and Natural Resources Office (Cenro) ug Maasim Municipal Environment and Natural Resources Office (Menro).
Giatul sa kahapunon ang pagbuhi sa mga gagmay nga pawikan aron masiguro ang survival basi na usab sa mga pagtuon nga kasagaran usa lamang ka porsyento sa gipangbuhi-an ang mabuhi.
Gani dakong bahad mao ang presensya sa mga predators sa kadagatan sama sa dagkong mga isda ug iho lakip na ang grabe nga polusyon.
Una nang gibutyag ni Forester Felix Robles, chief sa Coastal Resource and Foreshore Management Section sa DENR nga ilang gipasagdan nga magkamang ang mga gagmay nga pawikan aron ilang mahinumduman ang lugar nga natawhan kay kasagaran kanila mubalik paglabay sa 20 hangtud 25 ka tuig aron mangitlog.
Gani gideklara ang baybayon sa Barangay Lumasal nga nesting sites sa mga pawikan.
