GENERAL SANTOS CITY – Hugot nga giimbestigahan sa Protected Area Management Bureau (PAMB-Sarangani) ug Environmental Conservation and Protection Center (ECPC) ang sunud-sunod nga pagkakaplag sa tulo ka patay’ng pawikan sa managlaing area sa Sarangani Bay kaniadtong May 3, adlaw’ng Biyernes.
Unang nakaplagan ang usa ka patay nga olive ridley turtle sa baybay sa Brgy. Suli, Kiamba, Sarangani Province, Biyernes sa buntag.
Nasuta nga aduna kini samad sa sa punuan sa iyang left fore flipper.
Samtang pagka-alas-tres sa hapon sa mao gihapong adlaw, nakaplagan ang usa ka patay’ng female green sea turtle nga anaa na sa state of decomposition sa baybay sa may Queen Tuna Park ning siyudad.
Nasuta nga wala na ang tuo nga fore flipper sa maong pawikan ug nanggawas ang mga tinae.
Samtang pagkagabii sa maong adlaw gihapon nakaplagan ang olive ridley sa Brgy. Bula ning siyudad.
Nagluya na ang maong pawikan ug naputos sa algae.
Gawas sa naasoy’ng mga pawikan, nakatala usab ug sightings sa tulo ka dugong kon sea cow sa usa ka beach resort sa Brgy. Tambler ning siyudad.
Gumikan niini, subling nanawagan ang mga hingtungdang ahensya ngadto sa publiko nga likayan ang pagpahigayon ug mga kalihukan nga makaapekto sa mga “lamang-dagat”.
Ug kon makakita ug susama niini, gilayong i-report sa mga otoridad aron gilayong makahimo ug lakang ug posibleng maluwas pa ang naasoy’ng mga mananap.
