GENERAL SANTOS CITY – Gipanawagan karon ni PNP Regional Director Police Chief Supt. Eliseo Tam Rasco, labaw sa Police Regional Office 12, ngadto sa kapulisan nga nabiktima sa PPM kon Police Paluwagan Movement, nga magpasang-at sa ilang pormal nga reklamo.
Kini ang gibutyag ni Police Supt. Aldrin Gonzales, tigpamaba sa PRO-12, sa pakighinabi sa Bombo Radyo.
Sumala pa nga able ang ilang buhatan alang sa mga mag-file ug formal complaint, aron usab makapahigayonug pormal nga imbestigasyon.
Angayan matud pang pormal gayud nga magpasang-at ug reklamo tungod kon dili nila kini himuon, magpabiling istorya-istorya lang ang maong isyu.
Gihingusgan ni Supt. Gonzales nga wala nagkulang si Gen. Rasco sa pagpahinumdum sa iyang mga sakop nga dili muapil o musulod sa mga susamang investment scam.
Ug sa karon, may kamanduan na matud pa ang naasoy’ng opisyal ngadto sa ilang regional investigation division nga imbestigahan ang maong isyu.
Hinungdan nga nagpaabot na lamang kini alang sa mga magpasang-at ug reklamo.
Una niini, kahibaluan nga gikataho nga mukabat sa P1.99 billion na investment sa mga pulis ug sibilyan ang na-scam sa PPM nga ginapadagan matud pa sa usa ka Shiela Agustin.
Mikatag pa sa social media ang mga litrato ni Agustin kauban si PNP City Director Police Senior Supt. Raul Supiter, labaw sa General Santos City Police Office City.
Apan sa usa ka interview, gipanghimakak kini ni Agustin ug gihingusgan nga usa lamang usab siya sa mga nabiktima niini.
Kahibaluan nga base sa report, nakagawas na sa nasud si Agustin.
Nagtaguan na matud pa kini human makadawat ug mga bahad sa kinabuhi.
