GENERAL SANTOS CITY – Gipasalig sa City Health Office nga hugot ang ilang ginahimo nga pagmonitor sa mga ginadala nga pasyente nga may tipdas gikan sa Malapatan, Sarangani, aron dili makatakod sa mga taga-GenSan, ug malikayan nga magka-measles outbreak usab sa siyudad.
Sa pakighinabi sa Bombo Radyo kang Dr. Jett Oco, labaw sa CHO, gibutyag niini nga gatuyok ang mga taga-City Epidemiology and Surveillance Unit sa nagkadaiyang mga ospital dinhi sa siyudad ug ginasiguro nga gapatuman ug isolation ug infection control.
Ang mga pasyente sa tipdas ang ginakuhaan ug samples aron ipadala sa RITM sa Kauluhan, aron ipakumpirma kon tipdas gayud.
Samtang, gikumpirma usab ni Dr. Oco nga may nadawat silang report nga may natala nga kaso sa Pao-Pao, Sinawal, hinungdan nga gilayong gipaadtuan sa ilang team aron mag-imbestiga, mukuha ug blood samples, ug siguruhon nga mahimong luwas ang mga residente sa palibot.
Dungan niini, subling nanawagan si Dr. Oco ngadto sa mga ginikanan nga pabakunahan gayud ang mga anak aron mahimong luwas sa tipdas.
Kahinumduman nga 20 ka mga tawo ang namatay gikan sa Upper Suyan, Malapatan gumikan sa gituuhang measles outbreak.
