BOMBO GENSAN – Mismo si Senator Manny Pacquiao nanawagan sa katawhan nga mag-donate ug dugo sa nagkaduol nga Dugong Bombo 2018.
Matag tuig nga ginasuportahan sa senador ang blood-letting project sa Bombo Radyo Philippines nga usa ka corporate social responsibility sa kumpanya, nga ginapahigayon matag bulan sa Nobyembre.
Gibutyag niini, makatabang sa mga kababayan ang maong proyekto sa network.
Ubay-ubay na ka mga organisasyon ug grupo dinhi sa Soccsksargen ang mipasalig nga makighiusa sa Dugong Bombo 2018 pinaagi sa pagpakuha og dugo.
Matigayon kini sa Nobyembre 17, adlaw’ng Sabado, nga dungan nga ipahigayon sa 24 key cities sa tibuok nasud nga may Bombo Radyo ug Star FM stations, kung asa dinhi sa siyudad, ipahigayon sa Robinsons Place, sa Brgy Lagao.
Sa maong adlaw, tanan nga gustong magpakuha ug dugo ang ipailawom sa libreng check-up, kung asa masayran usab nila kon unsa ang ilang blood type.
Samtang, ang tanang successful blood donors ang makadawat ug libreng snacks, PRC card nga pwedeng magamit kon magkinahanglan ug dugo, Dugong Bombo Tshirt isip handumanan og pamatuod nga nahimong kabahin sa Dugong Bombo.
