GENERAL SANTOS CITY – Invalid o dili pwede nga mu-escort ang mga sakop sa kapulisan sa mga personalidad nga nalambigit sa mga pyramiding scam.
Kini ang gihingusgan ni Police Supt. Aldrin Gonzales, tigpamaba sa Police Regional Office 12, human sa nahimong hugot ang pahimangno ni PNP chief PDGen. Oscar Albayalde ngadto sa mga pulis nga nalambigit sa mga investments scam sama sa KAPA, kung asa gipasalig niini nga dili siya magduha-duha nga palagputon sa serbisyo ang mga pulis nga nalambigit sa susamang pagpangilad.
Sumala pa nga dili pwedeng m-escort ang mga pulis sa mga pribadong indibidwal nga nalambigit sa mga scam, gawas na lang kon may kamanduan gikan sa ilang mga labaw.
Kahibaluan nga may mga taho nga may mga pulis nga ga-escort sa mga personalidad nga miyembro o konektado sa KAPA, butang nga padayon pang ginaberipika.
Hinuon, gipasalig ni Supt. Gonzales nga kon may mga ebidensya nga magpamatuod sa maong taho, siguradong manubag ang kinsa mang pulis.
Pahimangno usab ni Gonzales sa mga kaubanang pulis nga himuon lamang ang tama base sa ilang mandato ug trabaho, ug likayan nga malambigit sa mga kabuang.
