GENERAL SANTOS CITY – Padayon ang manhunt operation sa mga otoridad batok sa nagpangalan Roger Dabuan, ang top 4 most wanted person, provincial level sa Sarangani Province.
Kini human nga nakaikyas atul sa operasyon sa kapulisan sa Datal Anggas Alabel Sarangani batuk sa amahan niini nga si Fernandez Dabuan, ang Top 5 Most wanted person, provincial level sa Sarangani.
Apan napatay ang amahan niini human nakigbayluanay ug buto og pusil sa mga operating unit.
Kahibaluan nga magkauban ang mag-amahan dihang gi-implementa sa otoridad ang warrant of arrest.
Narekober sa posisyon sa napatay nga suspek ang usa ka Caliber .30 M1 Garand rifle og homemade 12 gauge shotgun rifle nga adunay lain-laing bala.
Nasayran nga adunay pending nga kasong murder ang suspek sa RTC Branch 38 sa Alabel, Sarangani human nga gikasuhan sa Nenita C. Libanon nga taga Sitio Kalugbog, Brgy Datal Anggas, Alabel.
Kini may kalabotan sa pagpamusil patay sa suspek sa nagpangalan og Larry Libanon kaniadtong Sept. 11, 2016.
Samtang nagpaalim pa sa ospital ang Police Officer nga nasamdan dihang gi-implementa ang warrant of arrest sa Datal Anggas Alabel Sarangani Province batuk sa nahisgutang Top 5 Most Wanted Person, Provincial Level sa Sarangani Provincial Police Office.
Kahibaluan nga nakaangkon ug samad pinusilan sa tuo nga bahin sa iyang paa si PO3 Randy T Villarosa human nga maigo atul sa operasyon dihang misukol ang target nga si Fernandez Dabuan nga nag-atubang sa kasong murder.
Gumikan sa pagsukol sa maong suspek sa mga otoridad nga nagpahigayon sa operasyon, nagresulta kini sa iyang kamatayon.
Miaging adlaw dihang gibisita sa ospital ni P/C/Supt Eliseo Tam Rasco, Regional Director sa PRO 12 si Po3 Vilalrosa og gihatagan og ‘Medalya Ng Sugatang Magiting’.
Samtang, gikatakda usab nga pasidunggan sa regional director ang uban pang mga team members nga lakip sa gipahigayong operasyon.
