GENERAL SANTOS CITY – Nalipay ug naghinam-hinam matud pa si Sarangani Cong. Ruel Pacquiao sa development sa posibilidad nga mahinayon na ang rematch sa iyang igsuon nga si Sen. Manny Pacquiao ug retired unbeaten American boxer Floyd Mayweather Jr.
Kini human nga mismong si Mayweather na ang nagpadayag nga andam mubalik ibabaw sa boxing ring gikan sa iyang retirement aron makaatbang sa ikaduhang higayon ang eight division world champion.
Matud ni Cong. Pacquiao, kahigayunan na kini alang sa iyang magulang nga makabawi sa kapildihan sa una nilang away ni Floyd Jr. ug mapamatud-an kon kinsa gayud ang mas maayo tali sa duha ka boksingero.
Samtang, luyo nga wala pay pinal nga kasabutan, gatuo matud pa si Cong. Ruel nga makita nga may pagsinabtanay ang kampo sa iyang maguwang nga si Sen. Manny ug Floyd Jr., aron mahinayon na gayud ang giatangan nga May-Pac 2.
Gatuo usab matud pa ang manghod sa Pinoy ring icon nga posibleng ang paggawas niini sa puder ni Top Rank Big Boss Bob Arum, ang maoy nakaawhag sa American boxer aron muuyon alang sa rematch, kung asa direkta nang maka-negotiate si Mayweather kang Manny.
Gumikan niini, ginakonsidera usab matud pa nga mas dako na ang kitaon sa duruha sa matigayon nilang away ning higayuna, karon nga wala na sa eksena si Arum.
Kon ugaling mahinayon gayud, galaum matud pa si Cong. Ruel nga mahimong mas agresibo si Sen. Manny sa pag-atake, aron wala nay mahimong lusot ang American boxer.
Hinuon, dako matud pa ilang pagsalig sa maguwang gumikan maayo ug utukan kini nga boksingero, ug nasayod sa angayang himuon ibabaw sa ring aron makabawi ug magmalampuson na karong higayuna.
