GENERAL SANTOS CITY – Gawas sa pagka-high value target ug gun for hire, miyembro usab sa pro-Islamic State Ansar al Khilafah Philippines (AKP) ang napatay nga suspek sa natigayong buy-bust operation miaging gabii sa Lumakil, Polomolok, South Cotabato.
Kini ang gibutyag sa Bombo Radyo ni Police Chief Inspector Alex Orcajada, hepe sa Polomolok Municipal Police Station.
Hinungdan nga gikonsiderang dakong kalampusan sa kapulisan sa Polomolok ug ubang unit nga nakatambayayong nila sa natiagyong operasyon, ang pagkapatay sa suspek nga si Moods Nilong 25-anyos nga nailhan usab isip Moods Sulaiman, Alimudin Mamadra Sapano nga residente sa Purok Laguang, Rubber, Polomolok South Cotabato.
Ang nahisgutan maoy usab matud pa ang suspek sa pagpusil-patay kang PO2 Charlie Leyva nga sakop sa Surallah Municipal Police Station.
Una niini, kahinumduman nga nakamatikod ang kaubanan ni Nilong nga pulis ang ilang ka-transaksyon, hinungdan nga nagpabuto ug pusil sa mga otoridad. Mibalos usab ug pusil ang kapulisan nga nagresulta sa pagkamatay sa suspek.
Sa karon giimbestigahan sa kapulisan ang uban pang mga kaubanan ni Nilong, ug mga gikalambigitan niining krimen.
