GENERAL SANTOS CITY – Hapit wala mahinayon ang away ni Sen. Manny Pacquiao kang Lucas Matthysse sa Kuala Lumpur, Malaysia kaniadtong July 15.
Giangkon kini sa fighting senator sa exclusive interview sa Bombo Radyo.
Matud pa, dihang nagpa-ECG siya dinhi sa GenSan, may nakita nga abnormalidad sa iyang kasingkasing, usa ka semana una ang away.
Hinungdan nga wala nasayod ang tanan nga kaniadtong, July 8, midalikyat sa Maynila si Sen. Pacquiao ug nagpa-angiogram kaniadtong kaadlawon sa July 9 sa Cardinal Santos Medical Center.
Gibutyag sa senador nga gikan sa iyang kamot agi sa ugat, gisulod ang usa ka tubo ug camera padulong sa iyang kasingkasing.
Maayo na lamang matud pa, walay nakita nga bara sa ugat sa iyang kasingkasing, ug gipailawom na lang sa treadmill test, ug na-clear ug gideklarang ‘healthy ug fit’ sa mga doktor alang sa away.
Gilayon usab kining mibalik sa GenSan alang sa biyahe pagka-hapon sa entourage sa Team Pacquiao padulong sa Malaysia.
Giangkon usab ni Pacman nga kon ugaling may nakita nga bara kaniadto sa ugat sa iyang kasingkasing, andam matud pa sila nga dili ihinayon ang away.
