GENERAL SANTOS CITY- Gipasidunggan sa lokal nga panggamhanan ning siyudad ang mga players nga midaog sa Philippine National Games 2018, nga gipahigayon sa Cebu.
Kagahapong adlawa, gipresenta ang mga nasampit nga atleta atol sa flag ceremony.
Matud ni Lady Manalo sa City Sports Division, dakong dungog ang nahatag sa mga nasampit alang sa dakbayan. Ug gani, mas lisod ang kalaban sa mga atleta gumikan daghan ang mga miembro sa Philippine Team.
Apan usa matud pa kini ka pamaagi aron masukod ug makabansay usab ang mga miyembro sa Philippine Team nga makaapekto sa ilang ranking kung mapildi.
Samtang, ang mga boksingero nga taga-Gensan nga lakip sa RP Team ang wala na gipaapil gumikan may dakong kompetisyon sa gawas sa nasud nga gipangandaman sama sa mga Laurente Brothers.
Kahibaluan nga nahiman sa ika-unom nga pwesto ang Gensan, human nakasakmit ug 17 ka gold medals, 23 silver ug 30 bronze medals.. Gibutyag ni Manalo nga 50 ka lgu ang apil sa maong kompetesyon.
