GENERAL SANTOS CITY – Sunud-sunod na ang pagpamusil-patay nga natala dinhi sa dakbayan, sulod lamang sa usa ka semana.
Naatul usab kini sa pagsugod mismo sa pagpangatungdanan sa bag-ong labaw sa General Santos City Police Office nga si City PNP Director Senior Supt. Raul Supiter, kung asa daghan na sa mga opisyal sa lokal nga panggamhanan lakip na ang mga residente sa siyudad ang naalarma gumikan sa maong sitwasyon.
Nasayran base sa talaan sa kapulisan nga upat ang napatay sa managlaing insidente sa pagpamusil ang natala kaniadto pa lamang Semana Santa.
Ug pagka-adlaw mismo sa Pasko sa Pagkabanhaw, laing duha ka mga lider matud pa sa mga batang sukarap ang gipangpusil sa Brgy Fatima.
Ug miaging gabii usab may gipusil nga 17-anyos sulod sa usa ka bilyaran sa Brgy Apopong.
Bisan paman, mibalibad una si Police Senior Supt. Raul Supiter nga magkomento nganong sunud-sunod ang natala nga pagpamusil-patay kapin usa ka semana human sa pagsugod sa iyang pagpangatungdanan.
Hinuon, sa pakighinabi sa Bombo Radyo, gibutyag sa maong opisyal nga gatuo siya nga posibleng “coinsidence” lamang kini.
Dungan niini, gipasalig ni Supiter nga gipatutukan na ang mga nasampit nga kaso aron mahatagan ug kasulbaran.
