GENSAN- Gipasidunggan sa GenSan City Council ang usa ka CSU member gumikan sa gihimo niining pag-uli sa P12,000 sa usa sa mga miadto sa New Investment Center building nga nag-asikaso ug dokumento.
Atul kini sa natigayong sesyon kagahapong adlawa sa Sangguniang Panglungsod, kung asa giila ang nasampit nga CSU member nga si Maricel Martines.
Sumala pa nga wala niya gi-interesan ang maong kwarta bisag kinahanglanon kini gumikan basin may mas nanginahanglan.
Nasayran nga ang tag-iya sa iyang giuli nga salapi mao si Trinidad Cloma, nga mitambong usab sa sesyon kung asa iyang gisaysay ang pag-uli kaniya sa iyang salapi.
Gumikan niini girekomenda sa konseho kang Mayor Ronnel Rivera nga himuong regular nga trabahante sa siyudad ang nasampit nga empleyado.
