GENERAL SANTOS CITY -Galaum si Father Raul Vale, usa ka diocesan priest, nga ‘less bloody’ kon dili kaayo maduguon ang pagpatuman sa PNP sa Oplan Tokhang.
Matud ni Father Vale, nagtuo siya nga walay laing tumong ang maong programa aron mapukan ang mga nalambigit sa iligal nga druga, butang nga iyang hugot nga gisuportahan.
Apan, nanghinaut nga dili na masusama sa nahitabo kaniadto nga naputos sa kontrobersiya ang Oplan Tokhang tungod sa alegasyon sa pipila ka grupo nga matud pa adunay human rights violation og Extra judicial killings nga nahitabo.
Samtang, kalabut sa modified operational guidelines nga angayang kuyogan gikan sa miembro sa religious sector ang tokhang team atul sa pagbalay-balay, gibutyag ni Father Vale nga dili na kini kinahanglan.
Sa pamahayag sa diocesan priest, angayang isalig sa kapulisan ang pagpatuman niini tungod ilaha kining trabaho gawas pa nga sila ang may katakos og kahanas.
Kahibaluan, ang mga guidelines sa Oplan Tokhang ang gimugna sa pamunuan sa PNP katambayayong ang PDEA nga maoy lead agency sa anti-drug war sa administrasyong Duterte.
