GENERAL SANTOS CITY – Mas gipahugtan pa sa lokal nga gobyerno sa Malungon, Sarangani ang kampanya batok sa illegal nga druga sa munisipyo.
Lakip niini ang halapad nga pagpahigayon og anti-drug symposium sa nagkadaiyang tulunghaan.
Tumong sa kampanya nga maundang ang bahad gumikan sa iligal nga druga nga makaguba sa kinabuhi sa mga kabatan-unan.
Ang maong anti-drug campaign ang gipangunahan sa chairman sa Task Force D.U.T.E.R.T.E, nga si kanhing Malungon mayor Reynaldo Constantino, amahan sa kasamtangang mayor sa munisipyo nga si Maria Theresa Constantino.
Gawas sa mga eskwelahan, hugot usab ang pakig-alayun sa task force sa PDEA-12, PNP, Philippine Army, mga relihiyosong sektor og nagkadaiyang civil society organizations nga nakabase sa Malungon.
Sa sunod-sunod nga kampanya, gipahimangnuan ni Mayor Tessa Constantino ang mga magtutungha nga dili malambigit sa illegal nga druga dungan sa pagpasabot sa dautang epekto ngadto sa ilang pagtuon.
Niadtong Marso 29, nagpahigayon ang task force og information drive kalabot sa druga sa Malandag Institute og Malandag National High School kauban si Task Force D.U.T.E.R.T.E chair Constantino og PDEA 12 regional director Gil Castro.
