GENERAL SANTOS CITY – Nalakip ang duha ka mga sundalo nga gidagit sa mga New Peoples Army kon NPA sa Columbio, Sultan Kudarat, sa unom ka mga Prisoners of War nga andam matud pang buhian sa CPP-NPA bugti sa pagpadayon sa hinabing pangkalinaw.
Kini human gipagawas sa nahisgutang komunistang grupo ang listahan sa unom ka mga bihag matud pa nila nga andam nilang buhian kung asa gawas kanilang Sgt. Solaiman Calucop ug PFC Samuel Garay, andam matud pang buhian sa NPA silang PFC Edwin Salan nga gidagit sa Alegria, Surigao del Norte kaniadtong January 29; PO2 Jerome Natividad nga gidakop sa Talakag, Bukidnon kaniadtong February 9; Paramilitary Rene Doller ug -Paramilitary Carl Mark, nga managsamang gidakop sa Lupon, Davao Oriental kaniadtong February 14.
Kahibaluan nga gimando sa Communist Party of the Philippines sa New People’s Army nga buhian ang mga nasampit nga POW, isip pagpakita sa maayong tingua nila ug aron makumbinsi ang gobyerno nga subling ipadayon ang peace talks tali sa gobyerno ug CPP-NPA-NDF.
Kon makighiusa matud pa ang puwersa sa militar, posibleng mabuhian ang unom una pa man ang nakansela nga pagpanagpulong unta sa gobyerno ug NDFP sa Utrecht, Netherlands sa February 22 hangtod 27.
Kahinumduman nga gitakda unta ang nahisgutang pagpanagpulong sa Netherlands isip kabahin sa serye sa peace talks apan gipaundang kini ni Pangulong Rodrigo Duterte dihang giatras sa NPA ang ilang ceasefire.
Apan aron ipakita nga desidido ang kampo sa CPP nga iduso ang usa ka bilateral ceasefire agreement, andam matud pa silang buhian ang mga bihag.
