GENERAL SANTOS CITY – Gikatakdang magsumite ang Gabriela Partylist og resolusyon ngadto sa Kongreso aron maimbestigahan ang pagpriso og pagpasaka og kaso sa walo ka NPA members human nasikop sa natigayong engkwentro sa Datal Anggas Alabel Sarangani sa miaging semana.
Kahinumduman nga niadtong Sabado, midangop sa Alabel Municipal Police Station ang representante sa maong grupo nga si Arlene Brosas, kon asa gibutyag sa nasampit nga tumong sa paghidangat sa lugar aron matabangan nga mapagawas sa selda ang walo ka NPA members.
Gipasalig ang paghatag og abogado sa mga nahisgutan aron matutukan ang ilang kaso.
Gikanayong musumite ang Gabriela og mga dokumento alang sa pagsumite og resolusyon ngadto sa Kongreso aron maimbestigahan ang nahitabong engkwentro sa Alabel.
Nanawagan si Brosas sa kasundalohan og sa kasamtangang administrasyon nga ibalik ang peace talks.
Matud niini, angayang subling hisgutan ang mga ugat sa problema sa armed conflicts.
