GENERAL SANTOS CITY – Present ang tanang konsehal kagahapong adlawa, atul sa labing unang regular session ning tuiga, ug ika-22 nga regular session sa 18th Council sa Sangguniang Panglungsod ning dakbayan.
Atul sa iyang privilege speech, gihisgutan ni Vice Mayor Shirlyn Bañas-Nograles ang kalabutan sa 2017 strategic direction, kon unsa ang mga resolusyon nga angayan nilang mugnaon alang ning tuiga.
Lakip niini ang sugyot nga pag-adopt sa lokal nga panggamhanan sa organic farming, pag-establisar sa mga city land marks alang sa bahin sa City Economic Management and Development Office kon CEMCDO, ang posibilidad nga mupalit ug laing luna nga himuong public cemetery gawas sa Antonio C. Acharon Memorial Park alang sa bahin sa City Housing and Land Management Office, re-organization sa lokal nga panggamhanan, ug ang ordinansa kalabot sa pagmugna ug sports academy alang sa City Sports Office.
Samtang lakip sa unahon matud pa ning tuiga mao ang pagpahigayon ug imbestigasyon sa konseho may kalabutan sa P50 Milyon nga pondo alang sa local waste plastic recycling project.
