GENSAN– Mukabat sa 506 ang kaso sa dengue fever nga natala dinhi sa dakbayan sa Heneral Santos kung asa usa ang namatay.
Kini natala gikan Enero 1 2025 hangtod Marso 25 sa kasamtangang tuig.
Mikunhod og 29% ang ihap sa mga kaso ning tuiga sa pareho nga panahon umpara sa 713 nga kaso sa miaging tuig.
Samtang 32% sa mga natala nga kaso ang kumpirmadong dengue fever. Ang 48% sa mga kaso ang gikonsidera nga suspected o gidudahan nga dengue fever.
Kasagaran sa mga nagsakit og dengue nagpangidaron og nuebe anyos kung asa unom ka bulan ang pinakabata samtang 76 anyos ang pinaka-edaran. Sa 506 ka dengue cases, kapin sa tunga kon 52% ang lalaki.
Samtang gikan sa dagkong barangay sa GenSan ang may natala nga daghang kaso sa dengue kung asa nanguna ang Calumpang nga adunay 76, gisundan sa Fatima-62, Labangal-60, Apopong-46, Lagao(1st and3rd Road) 36, San-Isidro-28, Mabuhay-24, Buayan-24, Sinawal-20 og Bula-20 ka dengue cases ang natala.
