GENERAL SANTOS CITY- Lima na ang natala nga namatay dinhi sa siyudad sa Heneral Santos tungod sa sakit nga dengue.
Base kini sa data gikan sa City Health Office, kung asa gikabutyag nga kapin na sa 700 ka kaso sa maong sakit ang natala, sukad nagsugod ang 2017.
Matud pa ni Dr. Washington Loreno, labaw sa CHO, mas taas kini ug 150 percent itandi sa susamang panahon sa miaging tuig.
Giklaro usab sa maong opisyal nga angayang magtigum ang dengue monitoring and prevention team aron mahisgutan ang mga dugang pa nga lakang aron makontrola ang pagtaas sa kaso sa dengue.
Kahibaluan nga ang mga miyembro sa dengue monitoring and prevention team mao ang mga barangay kapitan sa siyudad.
Pinaagi sa mga mga barangay kapitan, ipadangat ang mga impormasyon hangtod sa purok nga angayang doblehon pa ang pagpanglimpyo sa palibot aron walay breeding ground o itlogan ang mga lamok.
Gipaklaro ni Dr. Loreno nga ang kasagarang nahitabo sa mga namatay tungod sa dengue gumikan ulahi na nga gidala sa doktor.
