GENERAL SANTOS CITY – Sa selda na magsaulog sa Mother’s day ang usa ka inahan human makuhaan ug druga sa buybust operation nga gipahigayon sa Philippine Drug Enforcement Agency 12.

Kini human napalitan ug usa ka sachet sa druga ang nagpangalan ug Mercedita dela Cruz, 51 anyos sulod mismo sa iyang panimalay sa Laray Bagsakan.

Alang kang PDEA 12 Director Gil Cesario Castro dili niya madawat ang rason sa suspek nga kalisod sa kinabuhi ang nagtokmod kaniya sa pagbaligya ug druga.

Matud ni Director Castro nga nahimong instrumento ang ginang sa pagpakatag sa druga sa Laray Bagsakan kung asa target ang mga mamaligya ug gulay.

Mukabat sa P3,000 kantidad sa druga ang nakuha kang dela Cruz bugti sa P1,000 nga mark money.

Una nang gibutyag ni Castro nga gikan sa Marawi ang druga nga gibagsak sa lugar.

Kaso sa pagsupak sa Section 5 kon pagbaligya sa Article 2 sa Comprehensive Dangerous Drugs Act of 2002 ang atubangon sa suspek nga ilang kustudiya.